SAS-streiken: – Heilt fastlåst

(NPK-NTB): Pilotforeiningane i SAS hadde måndag eit teammøte med riksmeklaren om status i samband med streiken. Den er framleis heilt låst, ifølgje riksmeklaren.

Litt før klokka 11 opplyste SAS-pilotane til NRK at møtet med riksmeklaren var over.

– Vi har hatt eit fellesmøte med alle partar no på formiddagen. Eg har i tillegg hatt dagleg kontakt med partane sidan konflikten starta. Konflikten er dessverre framleis heilt fastlåst, skreiv riksmeklar Mats Wilhelm Ruland i ein SMS til NTB kort tid etter.

– Vi kjem til å ha møte dei kommande dagane utan at det er fastsett noko nytt tidspunkt, seier han.

No ligg ballen hos SAS, seier leiar for SAS Norge Flygerforening, Jan Levi Skogvang, til NRK.

Den norske pressekontakten i SAS Tonje Sund skriv i ein SMS til NTB at selskapet ikkje ønskjer å kommentere prosessen «av respekt for den».