Satsing på Forsvaret betyr tøffare prioriteringar

(NPK-NTB): Medan finansminister Trygve Slagsvold Vedum (Sp) har varsla skattelettar, er statsminister Jonas Gahr Støre (Ap) meir nøktern før budsjettkonferansen.

– Eg vil vere ærleg på at når vi satsar så mykje på å ha eit tidsriktig forsvar, blir det mindre ekstra pengar til andre formål, seier Støre på ein pressekonferanse tysdag morgon.

Tysdag møtest regjeringa til den siste budsjettkonferansen sin før statsbudsjettet kjem i byrjinga av oktober. Dei store satsingane er allereie kjende: Forsvar, justis og helse.

– Den tryggingspolitiske situasjonen, kriminalitet og å få ned ventetida i helsevesenet er dei store satsingane. Det er ingen budsjettlekkasje, berre realitetar, seier statsministeren.

Finansminister Vedum har på si side lova skattelettar for folk flest. I fjor fekk dei med låge og middels inntekter i snitt kutta inntektsskatten sin med mellom 200 og 600 kroner, medan gruppene med høg årslønn fekk auka inntektsskatten sin noko.

Begge var på pressekonferansen innom eit av dei viktigaste talepunkta til regjeringa det siste året: Det såkalla vendepunktet i økonomien. Prisveksten er på veg ned, lønningane er på veg opp. Samtidig har lågare barnehageprisar og andre tiltak regjeringa fremja i tidlegare budsjett tredd i kraft.

(©NPK)