Ser gode resultat av kamp mot skattekrim

(NPK-NTB): Økokrims skattekrimprosjekt har på eit halvt år ført til 45 meldingar frå Skatteetaten. Det mest alvorlege gjeld meirverdiavgiftsunndraging på 500 millionar kroner.

Skattekrimprosjektet vart starta opp 1. november i fjor og er eit prøveprosjekt på to år. Målet er å stryke behandlinga av meldingar frå Skatteetaten til politiet.

Dei meldingane som elles ville ha gått frå Skatteetaten til Oslo og Aust politidistrikt, går no direkte til det Økokrim-leidde prosjektet. Sidan oppstarten har prosjektet fått inn 45 meldingar frå Skatteetaten, opplyser Økokrim i ei pressemelding

Meldingane omhandlar til saman cirka 160 straffbare forhold – der omfanget i sakene i prosjektet er varierande. Det mest alvorlege forholdet gjeld meirverdiavgiftsunndraging på cirka 500 millionar kroner. 

I tillegg har arbeidet resultert i to dommar, fleire tiltalar, og to vedtekne førelegg. Økokrim opplyser også at det så langt ser ut til at saksbehandlingstida blir monaleg redusert.

Førstestatsadvokat i Økokrim, Petter Nordeng, seier prosjektet ser ut til å kunne føre til eit kvalitetsløft for etterforsking, påtalebehandling og rettsforfølging av saker relatert til skattekriminalitet. 

– Skattekriminalitetsaker kan vere relatert til annan alvorleg kriminalitet. Kortare saksbehandlingstid og det å sjå saker i samanheng er viktig for den totale kriminalitetsnedkjempinga, seier Nordeng.

(©NPK)