Skattekortet: Åtvarar mot talblemme

(NPK-NTB-Sebastian Kaufmann Jacobsen): Over tre millionar har sjekka skattekortet sitt hos Skatteetaten i år. No er neste års kort ute, men feilaktige opplysningar kan koste deg dyrt, åtvarar etaten.

Skatteetaten har aldri hatt høgare trafikk på sidene med dei digitale skattekorta. Etter at skattekortet for 2025 vart tilgjengeleg måndag, lyder rådet frå etaten at du burde sørgje for å saumfare opplysningane dine.

– Vårt råd er å sjekke at tala stemmer overeins med det du forventar at du kjem til å ha i inntekt, frådrag, formue og gjeld i løpet av 2025, seier fungerande divisjonsdirektør Regine H. Vastvedt i Skatteetaten.

– Viss noko er feil eller manglar, må du sjølv endre skattekortet, seier ho.

Gjer du ikkje det, kan du risikere å få eit høgare skattetrekk enn det som er nødvendig. Det er også ein sjanse for at du betaler for lite skatt, og då må du bøte med restskatt og forseinkingsrenter som kjem dersom restskatten ikkje blir betalt innan fristen.

– Skatteetaten veit ikkje alt om deg, og du må derfor sjekke at opplysningane stemmer slik at du betaler rett skatt gjennom året, seier Vastvedt.

Som ein tommelfingerregel bør ein vurdere opplysningane i skattekortet minst éin gong i året, og når det skjer større endringar i livet, som overgang til pensjonisttilvære, sjukmelding, kjøp og sal av bustad eller endringar i lønn og lån, bør ein ta ein ny sjekk, ifølgje etaten.

Noko som er nytt frå neste år, er at frikortgrensa aukar frå 70.000 kroner til 100.000 kroner.

Alle som hadde frikort i år, får nytt frikort i 2025 automatisk. Men dersom ein har frikort og tener over grensa, trekkjer arbeidsgivar 50 prosent i skatt.

Dersom du betaler for mykje skatt, får du dette igjen seinare, men det er likevel lurt å bestille skattekort dersom ein forventar inntekt over grensa, rår Skatteetaten.

(©NTB)