Skjerpar reglane for turistfiske

(NPK): Frå 1. august blir det strengare for turistar å fiske her i landet. Målet er å sikre ei meir berekraftig turistfiskenæring.

Dagleg fangstrapportering for turistfiskebedrifter blir no påbydd, det blir innført 12 års aldersgrense for å bruke utførselskvote og det blir strengare krav til utførselsdokumentasjon ved grensepassering.

Fiskeri- og havministeren har vedteke å gradvis redusere utførselskvoten frå neste år. Frå 2026 får turistfiskarane berre lov å ta med ut av landet 15 kilo fisk to gonger i året, og frå 2027 blir kvoten 10 kilo to gonger i året.

– Eg har lytta til turistfiskenæringa, som seier at ein nedjustering frå denne sesongen vil skape stor uvisse for dei og deira gjester. Derfor endrar vi ikkje kvoten i år. Dette meiner eg vil gi næringa god tid til å innrette seg mot å satse på turisme som set fiskeopplevinga i sentrum, seier fiskeri- og havminister Marianne Sivertsen Næss i ei pressemelding.

(©NPK)