NPK-NTB: Regjeringa vil likevel ikkje gi auka skatt til alle som tener over 750.000 kroner i året, slik dei varsla i Hurdalsplattforma. Dei vil ikkje setje ny skattegrense.

I Hurdalsplattforma skreiv regjeringa at dei ville redusere inntektsskatten for dei med inntekter under 750.000 kroner og auke skatten for andre. Til VG seier finansminister Trygve Slagsvold Vedum (Sp) at dei går bort frå denne grensa.

– Talet var rett då vi laga Hurdalsplattforma saman i 2021, men det er ein annan røyndom i dag fordi det har vore to lønnsoppgjer imellom. Senterpartiet og Arbeidarpartiet vil automatisk justere talet opp på grunn av prisvekst og lønnsvekst, seier Vedum.

Dersom regjeringa hadde behalde grensa, ville fleire grupper måtte betalt meir i skatt. I mai var prisveksten på 6,7 prosent samanlikna med same tid i fjor, ifølgje SSB.

– 700.000 kroner i år er mindre verd enn det var i 2021. Vi ønskjer ikkje at du reelt sett skal få ei høgare skattebelastning. Vi vil at det skal vere litt mindre, seier finansministeren.

Det betyr at nokre av dei som tener over 750.000 kroner vil få lik eller mindre skatt neste år. Detaljane blir først klare i statsbudsjettet.