Smitterekord i Ålesund

(NPK-NTB): Ålesund kommune har registrert 26 nye koronatilfelle det siste døgnet. Det er det høgaste talet smitta på eit døgn under pandemien.

Kommunen opplyser at sju av dei smitta har ukjend eller usikker smitteveg.

På grunn av høge smittetal den siste tida vart det måndag innført ei ny lokal forskrift for Ålesund og Sula. Det er innført påbod om munnbind der ein ikkje kan halde éin meters avstand. Tilrådinga om å ha maksimalt ti personar på besøk heime blir vidareført. Det er unntak for fullvaksinerte.

Munnbindpåbodet kjem etter ein kraftig smitteauke i kommunen den siste tida, der spesielt unge vaksne og barn er ramma. Den siste veka er det registrert rundt 80 smittetilfelle av covid-19.

(©NPK)