Spår bensinprisar opp mot 35 kroner literen

(NPK-NTB): Dagens høge drivstoffprisar er berre byrjinga på kva vi har i vente dersom krigen mot Iran held fram, trur økonomiprofessor Kjetil Storesletten.

Storesletten, som er tilknytt økonomisk institutt ved Universitetet i Oslo, seier til Klassekampen at dersom krigen blir langvarig vil nordmenn merke det aller hardast på drivstoffprisane.

Pumpeprisen ligg i dag opp mot 26 kroner literen, men kan fort passere 35 kroner om oljeprisen går opp mot 150 dollar fatet, seier han.

Onsdag skreiv E24 at analysebyrået Wood Mackenzie ventar oljeprisar på 150 dollar fatet dei neste vekene. Føresetnaden er at sjøvegen for oljeeksport gjennom Hormuzsundet held fram med å vere stengt. Dei åtvara også om at oljeprisen kan stige opp i 200 dollar fatet i løpet av 2026 som følgje av krigen. Før krigen låg prisane omkring 70 dollar per fat.

Storesletten trur fleirtalet av bilistane vil takle ein kort periode med ekstremprisar, men at regjeringa må på banen dersom dei ekstraordinære prisane bit seg fast.

For kvar liter drivstoff nordmenn kjøper, må dei ut med vegavgift, CO₂-avgift og moms til staten – og samanlikna med andre land har Noreg eit høgt avgiftsnivå på drivstoff.

– Det finst stort handlingsrom til å justere avgiftene mellombels i ein krisesituasjon, seier Storesletten.

(©NPK)