Spår vanskeleg lønsoppgjer

LO kan måtte be regjeringa bidra under lønnsoppgjeret ved å bremse utgiftene til straum, mat og renter.

Lønnsoppgjeret er eit mellomoppgjer. Det betyr at ein i utgangspunktet berre skal forhandle om lønnstillegg. Likevel kan det bli det vanskelegaste på mange år, skriv Klassekampen.

Prisveksten på 5,8 prosent i fjor betyr at dei fleste arbeidstakarane i Noreg har opplevd ein reallønnsnedgang ein må tilbake til 80-talet for å finne maken til.

– Eg trur regjeringa må på bana på eit tidspunkt, seier leiar Christopher Beckham i Handel og Kontor til avisa.

Han sit i LOs inntektspolitiske utval, som førebur lønnsoppgjeret og utarbeider forslag til kva krav som skal liggje til grunn for oppgjeret.

Jan Olav Andersen, leiar i El og IT Forbundet og som også sit i utvalet, seier det er ekstremt vanskeleg for LO å gå inn i eit oppgjer utan å minst ha som ambisjon å halde oppe kjøpekrafta.

– Det kan oppnåast på fleire måtar, både med lønnsvekst og med tiltak som bidreg til lågare prisvekst. Om styresmaktene kan gjere noko, anten det er rente, straum eller anna som dempar prisveksten, vil det kunne gjere det enklare, seier Jan Olav Andersen, leiar i El og IT Forbundet.