Større pels-erstatning

NPK-NTB: I samband med avviklinga av pelsdyrnæringa blir kompensasjonsordninga auka med 150 millionar kroner.

– Avviklinga har skjedd raskare enn det ein har rekna med, og det er berre eit fåtal pelsdyroppdrettarar som framleis har pelsdyr, heiter det i ei pressemelding frå Landbruksdepartementet.

Regjeringa foreslår òg å auke løyvinga til omstillingsordninga for oppdrettarar med 15 millionar kroner i år. Mange har søkt på ordninga, ifølgje regjeringa, som ønskjer å gjere det mogleg med ei rask omstilling til anna verksemd.

Stortinget gjekk inn for eit pelsforbod i 2019. Saka blir rekna som ein stor siger for Venstre, som fekk gjennomslag for at pelsdyrnæringa skal avviklast innan 2025.