Stad kommune kan bli skatteparadis

Stad kommune skal greie ut om dei skal halvere formuesskatten, eit tiltak som vil gjere at dei nesten kan måle seg med skatteparadiset Bø i Vesterålen.

Frå før av har om lag 15 kommunar flørta med ideen. Blant dei er Strand, Asker, Tvedestrand og Færder, ifølgje NRK Vestland.

– Stad er ei attraktiv kommune å bu i, og med låg formuesskatt vil ein òg kunne tiltrekkje seg norske bedriftseigarar og samstundes få store ekstrainntekter til kommunen, skriv Hogne Bleie, Frps kommunestyrerepresentant, i ei pressemelding.

Kommunen har vedteke å greie ut ei halvering av dagens nivå av formuesskatten på 0,7 prosent. Regjeringa er i ferd med å auke formuesskatten frå 0,85 til 1,1 prosent for landets rikaste.

Ifølgje varaordførar i Stad, Siri Sandvik (Ap), er dette ein dårleg idé.

– Det er ikkje rett at kommunane skal byrje å «fallby» kvarandre for å tiltrekkje seg milliardærar, seier ho.

Forslaget skal bli behandla i kommunestyret i juni.