NPK: Måndag 12. juni stengjer Statens vegvesen det vestre seglingsløpet under Måløybrua i Kinn kommune i Nordfjord. Årsaka er bygging av skipsbarriere.

Barrieren skal hindre at skip køyrer på den midtre brupilaren, opplyser Statens vegvesen i ei pressemelding.

Tidlegare i år og i fjor har det vestre løpet vore stengt for fundamentering til same prosjektet.

– Det er tryggleiksomsyn som gjer at vi må stengje vestre løpet for all sjøtrafikk i perioden 12. juni til 31. august, seier byggjeleiar Pål-Anders Rindal i Statens vegvesen.

Farleia vert stengt med bøyer nord og sør for det vestre seglingsløpet. Det skal også vere vakthald døgnet rundt.

I samband med stenginga må Statens vegvesen stengje gangfelta oppe på brua i kortare periodar 12. juni, 22. juni og 31. august.