Sterk vekst i utanlandsk kortbruk i sommar

(NPK-NTB): Utanlandske turistar trekte kortet oftare og brukte meir pengar i Noreg i sommar enn i fjor, og særleg turisme frå oversjøiske marknader som USA og Irland auka.

Omsetninga frå utanlandsk turisme voks med heile 4,2 prosent samanlikna med i fjor, ifølgje tal frå IT-konsernet Nets.

– Det tyder på at Noreg er ein fin og relativt rimeleg feriedestinasjon, seier Snorre Corneliussen hos Nets.

IT-konsernet tilbyr betalingsløysingar til bedrifter, bankar, butikkar og offentlege verksemder i heile Europa. Nets handterer mellom anna infrastrukturen bak betalingsterminalar, Bankaxept, og andre transaksjonstenester.

Veksten i utanlandsk kortbruk er likevel svakare enn dei to tidlegare somrane, i 2022 og 2023, som var prega av sterk vekst etter pandemien og reiserestriksjonar.

Den største turistgruppa kjem frå Danmark og står for 27, 3 prosent av den totale omsetninga, med ein moderat vekst på 3,6 prosent. Amerikansk kortbruk aukar kraftig med 21,5 prosent, og utgjorde i sommar 16,1 prosent av omsetninga.

Kortbruken til irske og britiske turistar aukar òg, med høvesvis 16 og 13,2 prosent. Samtidig minkar kortbruken frå tyske turistar med 5,1 prosent og finske turistar med heile 32,1 prosent.

Dei høgaste summane er det irane som står for, med eit gjennomsnitt på 158 euro per kjøp, etterfølgde av turistar frå Singapore med eit gjennomsnitt på 72 euro.

(©NPK)