– Stolte, takknemlege og audmjuke

Sula Vekst er kåra til Årets bedrift 2025 i Møre og Romsdal av politikarane i fylkeskommunen. 

Verksemda blir heidra for å kombinere høg kvalitet og profesjonell drift med eit tydeleg inkluderingsoppdrag, ifølgje ei melding frå Møre og Romsdal fylkeskommune.

– Vi er stolte, takknemlege og audmjuke for å få prisen. Vi er ein hjørnesteinsbedrift i Sula kommune og har medarbeidarar som står på kvar dag med sine utfordringar, som kanskje mange andre ikkje står i. At dei er ein del av arbeidslivet og næringslivet, er berre imponerande, uttaler dagleg leiar Øyvind Vebenstad i Sula. 

Han vil dele prisen med alle arbeids- og inkluderingsbedrifter. 

Sula Vekst har om lag 31 arbeidsplassar i varig tilrettelagt arbeid (VTA) i tillegg til ordinært tilsette. 

Bedrifta driv innan vaskeri, sy og segl, miljø- og brenseltenester i tillegg til maritim produksjon. Fleire produkt blir eksporterte til over 60 land. 

Det er Kompetanse- og næringsutvalet som avgjer kven som får prisen som blir delt ut på fylkestinget 21. april.