Stoltenberg vil granske innskotsrentene til bankane

(NPK-NTB): Finansminister Jens Stoltenberg (Ap) har bede Finanstilsynet undersøkje innskotsvilkåra til bankane etter Dagens Næringslivs avsløringar om kundar som får renter heilt ned mot null.

I eit brev til Finanstilsynet ber Finansdepartementet om ei forklaring om vilkåra på innskot i norske bankar og om det er behov for regelverksendringar eller andre tiltak for å styrkje posisjonen til forbrukarane i marknaden, skriv Dagens Næringsliv.

– Prisopplysningar på Finansportalen og medieoppslag den siste tida viser at prisinga av ulike innskotsprodukt varierer betydeleg, skriv departementet i brevet, og viser til at det for enkelte produkt er stilt spørsmål ved kor rimelege vilkåra er.

Bakgrunnen er DNs saker i haust om bankar som har tilbode leigetakarar renter mellom 0,0 og 0,1 prosent på depositumskontoar – trass i lovkrav om «normale rentevilkår». Etter oppslaga har 25 bankar auka rentene.

Avisa har også skrive om låge renter på kontoar for personar med verje, der fleire bankar har gjennomført rentejusteringar den siste månaden.

Finanstilsynet skal også sjå på korleis bankane gir rådgiving til ulike kundegrupper. Vurderingane skal vere klare innan 19. februar 2026.

(©NPK)