Stor vekst i vareeksporten

Den samla vareeksporten enda på 97,9 milliardar kroner i juni, heile 70,7 prosent meir enn i juni i fjor, ifølgje tal frå SSB.

Dette er den tredje høgaste verdien som er målt i ein enkeltmånad, opplyser Statistisk sentralbyrå (SSB).

Råolje-, naturgass- og fastlandseksporten bidrog til auken.

I juni vart det eksportert råolje for 26,8 milliardar kroner, ein auke på heile 76,1 prosent frå same tid i fjor. Oppgangen kjem hovudsakleg av høgare pris.

Prisen på naturgass var dessutan historisk høg. Verdien av naturgasseksporten enda på nesten 22 milliardar kroner i juni, nesten ei firedobling frå juni i fjor då prisane var ekstremt låge.

Handelsoverskotet var på 25 milliardar kroner i juni.