Supervekst for Ålesund-selskap

Ålesund-selskapet Up & Away Digital fekk ei kraftig auke i inntektene i fjor. Omsetninga gjorde eit hopp frå 4,7 millionar til heilt 8,3 millionar kroner i fjor. 

Saman med veksten klarte dei å halde lønnsemda oppe, og fekk eit lite pluss på botnlinja.

Nett No omtala selskapet som Jostein Dahl Gjelsvik og Stefan Olsen starta midt under koronapandemien, i fjorårets Nett No-magasin. 

Dei digitale nerdane fortalde at dei såg ein marknad for teknisk spissa digitale tenester på sida av det dei tradisjonelle reklamebyråa dreiv med. 

Gjelsvik og Olsen eig 33 prosent kvar av selskapet, medan Converto Holding eig 34 prosent av aksjane. Eigenkapitalen var på drygt 1,1 millionar kroner ved utløpet av fjoråret, og selskapet hadde ikkje langsiktig gjeld.