Svak loddevekst

Låg vekst hos lodda og manglande toktdekning på russisk side gjer at kvoterådet for 2023 blir lågare enn i fjor.

Loddeveksten har det siste året har vore svært svak. Norske og russiske havforskarar meiner likevel det er forsvarleg å fiske opptil 62.000 tonn lodde i 2023.

– Den norske sona vart godt dekt og danna utgangspunkt for rådet. Vi berekna bestanden i dekningsområdet til om lag 2,2 millionar tonn, seier havforkar Georg Skaret i ei pressemelding. Han sit i den norsk-russiske forkargruppa som gir kvoteråda i år.

Det norsk-russiske økosystemtoktet i Barentshavet, er den viktigaste kjelda til kunnskap om loddebestanden.

– Grunna tekniske problem med det russiske fartøyet fekk vi i år inga dekning i russisk sone. Det gjorde arbeidet meir krevjande. Den manglande dekninga fører til større uvisse i anslaga våre og dette er reflektert i rådet, seier Skaret.

Denne veka møtest Noreg og Russland til digitalt møte i den norsk-russiske fiskerikommisjonen og loddekvota for neste år vil då endeleg bli fastset.