Svakare enn venta for Norsk Hydro

(NPK-NTB): Norsk Hydro tente 5,84 milliardar kroner på drifta i andre kvartal i år, ned frå 7,1 milliardar kroner i same kvartal i fjor.

Aluminiumprodusenten Hydro la fram tal for andre kvartal tysdag morgon. På førehand var det venta eit justert brutto driftsresultat på 6,15 milliardar kroner, ifølgje estimat frå tolv analytikarar innhenta av selskapet sjølv.

Omsetninga for kvartalet kom inn på 50,9 milliardar kroner, ned frå 53,6 milliardar kroner i same periode i fjor.

I rapporten peikar selskapet på lågare volum i extrusion-segmentet, resirkuleringsmarginar og spotsal i energy-segmentet som årsak til nedgangen. Høgare aluminiumprisar og lågare råvarekostnader bidrog positivt på resultatet.

Det er første gong konsernsjef i Hydro, Eivind Kallevik, legg fram kvartalstal etter at han i mai tok over rolla etter Hilde Merete Aasheim.

– Den positive utviklinga i dei viktigaste inntektsdrivarane våre frå første kvartal heldt fram inn i andre kvartal og bidreg til solide resultat i oppstraumsverksemda, seier Kallevik i børsmeldinga.

(©NTB)