Svakare kvartal for Equinor

(NPK-NTB): Equinor fekk eit justert driftsresultat på 6,9 milliardar dollar i tredje kvartal. Det er milliarden svakare enn i same periode i fjor.

– Vi har god drift og solide resultat og er i rute til å levere sterk kontantstraum frå drifta. Dette er i tråd med det vi sa på kapitalmarknadsoppdateringa i februar, seier konsernsjef Anders Opedal i samband med offentleggjeringa av kvartalsrapporten for tredje kvartal torsdag morgon.

Medan Equinor fekk eit justert driftsresultat på 6,9 milliardar dollar – med frå 7,9 milliardar dollar i fjor – enda justert resultat på 2,2 milliardar dollar i tredje kvartal. Også det er markant svakare enn i tredje kvartal i fjor, då resultatet enda på 2,9 milliardar dollar.

På førehand låg anslaget til analytikarane på 7,08 milliardar dollar, ifølgje data henta inn av selskapet sjølv, skriv Dagens Næringsliv og Finansavisen.

Sistnemnde kallar Equinor-resultat ein «liten resultatmiss».

Konsernet melder om framleis satsing på fornybar energi, parallelt med at det leverte den høgaste produksjonen nokosinne frå Troll-feltet i gassåret.

Johan Sverdrup-feltet sette produksjonsrekord med over 756.000 fat olje på éin dag i løpet av kvartalet. Feltet nådde også ein milepæl ved å ha produsert éin milliard fat sidan oppstart for fem år sidan, ifølgje Equinor.

– Dette styrkjer evna vår til å levere sikker og påliteleg energi til Europa, seier Opedal.