Telenor-omsetning på 20 mrd. i 2. kvartal

– I andre kvartal held vi fram med å levere på strategien vi la fram i fjor, med solid operasjonell framdrift. Kvaliteten på tenestene våre og gode tryggingsløysingar held fram med å drive vekst, seier konsernsjef Sigve Brekke i Telenor i ei børsmelding.

– Vi held fram arbeidet med moderniserings- og effektiviseringstiltak som kjem til å drive forbetra kontantstraum over tid, legg Brekke til.

Tala for Telenors andre kvartal, som vart lagt fram torsdag morgon, viser at selskapet omsette for 20,2 milliardar kroner og fekk eit brutto driftsresultat på 8,5 milliardar.

Auke i tenesteinntekter
Tenesteinntektene var 15,8 milliardar kroner, som er ein auke på 0,8 milliardar kroner eller 5 prosent samanlikna med andre kvartal i 2022.

På førehand var det venta at Telenor skulle levere ei omsetning på 19,77 milliardar kroner og eit brutto driftsresultat (EBITDA) på 8,63 milliardar kroner. Det viser eit snitt av forventningane til analytikarane som Bloomberg har henta inn, skriv E24.

Altså slo selskapet forventningane til omsetning, men leverte eit dårlegare brutto driftsresultat enn venta.

Telenor-aksjen er opp 12,94 prosent så langt i år, men ned 17,54 prosent i løpet av det siste året, skriv avisa.