NPK-NTB: Staten tilbyr 2,62 milliardar kroner i jordbruksoppgjeret, tilsvarande ein inntektsvekst på rundt 70.000 kroner per årsverk. Bøndene krev 3,9 milliardar.

Staten leverte tilbodet sitt måndag, ti dagar etter at bøndene kom med kravet sitt.

– Staten leverer i dag eit godt tilbod som følgjer opp stortingsmeldinga om auka sjølvforsyning og inntektsopptrapping. Tilbodet viser at opptrappingsplanen blir følgd, og det blir lagt opp til å tette ein tredel av inntektsgapet allereie i tilbodet i år, seier forhandlingsleiaren i staten Viil Søyland i ei pressemelding.

Tilbodet legg opp til at ein tredel av inntektsgapet mellom jordbruket og andre grupper kan tettast allereie i år. Inntektsveksten staten tilbyr ligg på rundt 70.000 kroner per årsverk, og ein reduksjon i inntektsgapet med 45.000 kroner per årsverk.

Tilbodet blir finansiert med ei auka løyving i statsbudsjettet på 1,944 milliardar kroner, og dessutan ein auke i målprisane for jordbruksavtalen med 526 millionar kroner.

– Isolert sett vil forslaget gi ein auke i matutgifter på 350 kroner per år for eit gjennomsnittleg hushald, skriv Landbruks- og matdepartementet i pressemeldinga.