To politifolk per 1.000 innbyggjarar

Ved årsskiftet var politidekninga i Noreg 2,03 per 1.000 innbyggjarar. Dermed har regjeringa nådd målet dei sette seg i 2008.

Ved utgangen av 2020 var politidekninga 2,03 per tusen innbyggjarar, skriv Justis- og beredskapsdepartementet fredag ettermiddag. Ved å leggje til 400 nye faste stillingar i politiet som følgje av pandemien, blir dekninga 2,09 politifolk per tusen.

Med denne dekninga har regjeringa nådd målet om ei dekning på 2 politifolk per tusen innbyggjarar.

– Sidan 2013 har bemanninga til politiet auka med over 3.600 årsverk, over 2.500 av desse er politiårsverk. Det har aldri før vore fleire tilsette i politiet, seier justis- og beredskapsminister Monica Mæland (H).

Då regjeringa tiltredde var dekningsgrada på 1,71.

– Det gledelege er at alle politidistrikta har fått fleire politiårsverk, og alle har fått auka dekningsgrad samanlikna med 2013. Grunnberedskapen er styrkt i heile landet, den operative innsatsevna til distrikta er betra, og politiet utfører meir og betre tenester på staden, seier Mæland.