Trur prisveksten skal ned til 4,6 prosent

(NPK-NTB): Prisstiginga skal ned til 4,6 prosent dei tolv neste månadene, trur økonomane i den siste forventningsundersøkinga til Noregs Bank.

Forventningane til økonomiekspertane i undersøkinga er derimot litt høgare enn førre kvartal, då dei meinte prisveksten skulle ned til 4,4 prosent.

Den generelle prisveksten (KPI) var ifølgje SSB 5,4 prosent i juli.

Undersøkinga kjem kvart kvartal og måler forventningane økonomiekspertar, partane i arbeidslivet, hushalda og næringslivsleiarar har mellom anna til prisstigning, lønnsvekst, sysselsetjing og lønnsemd.

Partane i arbeidslivet ventar ei prisstigning på 4,9 prosent, opp 0,2 prosentpoeng frå førre kvartal.

Næringslivsleiarane ventar ei prisstigning på varer og tenester om tolv månader på 5,8 prosent, uendra frå førre kvartal.

Hushalda er dei mest optimistiske i undersøkinga. Dei ventar ei prisstigning på 4,3 prosent dei neste tolv månadene. Det er 0,3 prosentpoeng høgare enn førre kvartal.