Turistar finn alternativ til Trollstigen

(NPK): Aldri før har så mange køyrt Aursjøvegen som i juli. Etter at Trollstigen blei stengd tidlegare i sommar, har nemleg andre norske vegar fått auka merksemd.

Det skriv NRK.

Aursjøvegen ligg om lag to timar unna den populære turistattraksjonen Trollstigen ved Åndalsnes, som stengde tidlegare i sommar. Stenginga har gjort at turistane trekkjer mot andre turmål, som til dømes Aursjøvegen som ligg mellom Sunndalsøra og Eikesdal på Nordmøre.

– Vi har prøvd å marknadsføre oss betre i samband med stenginga av Trollstigen, via Visit Nordvest. Det trur eg har hjelpt, for ein del av turistane kjem nok derfrå, seier Terje Erstad, styreleiar i Aursjøvegen AS.

I juli hadde vegen over 4700 passeringar, 600 fleire enn på same tidspunkt i fjor. Vegen er om lag 53 kilometer lang.

Aursjøvegen kan minne om Trollstigen og har krappe hårnålssvingar og tunnelar med 360 gradars vending gjennom.

(©NPK)