Uendra rente

NPK-NTB: Som venta beheld Noregs Bank styringsrenta uendra på 4,5 prosent. Slik blir det truleg ut året, varslar sentralbanksjefen.

Det har Noregs Banks komité for pengepolitikk og finansiell stabilitet bestemt. Avgjerda er i tråd med det Noregs Bank varsla i september.

– Truleg held vi renta på 4,5 prosent ut året, seier sentralbanksjef Ida Wolden Bache også denne gongen.

Vurderinga til komiteen er at det framleis er behov for ein stram pengepolitikk for å få prisveksten ned.

– Prognosane vi la fram i september, indikerte ein gradvis nedgang i styringsrenta frå første kvartal neste år. Utsiktene for norsk økonomi ser ikkje ut til å vere vesentleg endra sidan førre rentemøte, heiter det vidare i pressemeldinga.

Sjølv om prisveksten har minka raskare enn venta det siste året, også i september, har renteforventningane ute auka, og krona har vore litt svakare enn venta, påpeikar komiteen.