Varslar rekordkjøp av helsetenester

NPK-NTB: For å nå målet er Vestre villig til å setje rekord i kjøp av private helsetenester.

I eit intervju med Nettavisen varslar Vestre at for å komme ned på 2019-nivå må helsekøane reduserast med to vekers ventetid. Innan vel eit år.

– Vi skal snu trenden i år og ha ein markant reduksjon gjennom 2025, seier han.

– Det er veldig ambisiøst, for å seie det varsamt. Ein del hadde ikkje tort å setje det målet, for å seie det slik. Ein så stor reduksjon i ventetider på så kort tid, det har vi ikkje gjort i Noreg før, seier han, men meiner likevel at det er realistisk.

For å nå måla er eit tett samarbeid med arbeidstakar- og givarorganisasjonane éin del av oppskrifta. Ein meir omdiskutert del av løysinga er bruken av private helseaktørar, noko Vestre som Arbeidarpartipolitikar seier han ikkje har nokon problem med.

– Vi har alltid hatt eit positivt syn på samarbeid mellom offentleg, ideell og privat sektor, hevdar han.

– Det er helseregionane som inngår avtalar med private, og det er ikkje umogleg at det i år kan bli rekord i kjøp av private tenester frå helseføretaka, innrømmer Vestre.

– Då vi sat i regjering i 2013 og dreiv valkamp, meiner eg at vi frå helseføretaka kjøpte private helsetenester for om lag 13 milliardar. I år kjem vi nok til å passere 17 milliardar, seier helseministeren.