Vil byggje ut verna vassdrag

Frp vil byggje ut meir vasskraft, og tysdag fremjar dei eit forslag til Stortinget om å vurdere utbygging av ny vasskraftproduksjon i verna vassdrag.

– Regjeringa kan ikkje lenger sitje stille og sjå på at det enorme kraftpotensialet i norsk vasskraft ikkje blir teke ut. No er vi nøydde til å ta grep for å auke vasskraftproduksjonen for å sikre hushald og industri tilgjengeleg og rimeleg straum i åra som kjem, seier energipolitisk talsperson i Frp, Marius Arion Nilsen, til NTB.

Han meiner forslaget vil sikre stor auke i kraftproduksjon i åra som kjem.

– Ny teknologi har gitt nye moglegheiter for å byggje ut kraft i vassdrag på ein skånsam måte som ikkje truar viktige miljøverdiar. Eg forventar at regjeringa er positivt innstilt til å gi sin sjølvutnemnde energikommisjon eit slikt mandat, seier Nilsen.

Forslaget går ut på å gi energikommisjonen mandat til å gå gjennom verna vassdrag og vurdere om det er potensial for utbygging av vasskraft.

I januar stemde Frp og Sp som dei einaste partia på Stortinget for eit forslag om å auke norsk kraftproduksjon ved å opne verna vassdrag for utbygging.

(©NPK)