Vil ha hjelp frå staten
Kysttrafikken på etterskot med utsleppskutt.
NPK-NTB: Norske reiarlag ligg langt etter skjemaet for å nå målet om ei halvering av utsleppa innan 2030. Havministeren lovar eit samarbeid for å komme i mål.
Ifølgje E24 skulle reiarlaga her i landet ha hatt 239 grøne skip i ordre for å vere i rute med klimamålet. Ved årsskiftet var 46 slike fartøy i ordrebøkene.
– Vi er lova å bli høyrde i prosessen vidare, men ventar framleis på konkret dialog. Vi sit alle og berre ventar på regjeringa, seier Tor Arne Borge, som er administrerande direktør i Kystrederiene.
Bransjeorganisasjonen har 200 reiarlag som medlemmer.
Fiskeri- og havminister Bjørnar Skjæran (Ap) vedgår at det går for tregt innan innanriks skipsfart.
– Men vi vil jobbe hardt saman med næringa for å komme i mål, seier Skjæran, som likevel ikkje vil ta heile rekninga.
Han understrekar at dette handlar om budsjettspørsmål i kvart enkelt statsbudsjett.
– Eg vil ikkje spekulere over kva som kjem til hausten, men vi er godt i gang med arbeidet, seier statsråden.
Publisert: 03.08.2022 08:28
Sist oppdatert: 03.08.2022 08:32