Vil skjerpe reglane om norsk lønn på skip

(NPK-NTB): For å sikra at arbeidarar i norske skip og farvatn får norske lønnsvilkår, foreslår regjeringa å skjerpa reglane.

I det nye forslaget må oppdragsgivarane sørgja for at leverandørane skriv arbeidskontraktar om lønn. I tillegg må det førast kontroll med at lønnskrava blir overhaldne.

Det var i mai at Stortinget vedtok at norske lønnsvilkår skal gjelda for sjøfolk som opererer på skip i norske farvatn.

– Arbeid til havs skal skje på norske vilkår og med rettferdig lønn. Det er plikta til oppdragsgivarane å følgja opp at det skjer. Regjeringa foreslår no reglar for korleis oppdragsgivarar i havnæringane skal sørgja for at dei tilsette på skipa faktisk får rett lønn, seier fiskeri- og havminister Marianne Sivertsen Næss (Ap) i ei pressemelding frå regjeringa.

Endringane betyr at selskap som har løyve til å driva med olje, gass, havvind, akvakultur eller mineralutvinning til havs skal sørgja for at dei som jobbar på skip som utfører oppdrag for dei, får lønn som minst svarer til norske tariffavtalar.

(©NPK)