Vindkraftkommunar får pengar

(NPK-NTB-NETT.NO): Som eit plaster på såret til kommunar som har bygd vindkraftanlegg, får kommunar, lag og foreiningar i ti fylke til saman 28 millionar kroner.

Pengane skal gå til å fremje friluftsliv og naturmangfald i område med vindkraft, skriv Klima- og miljødepartementet i ei pressemelding.

– Det er viktig at vi gir noko tilbake til dei som er ramma av vindkraft. Arbeidarparti-regjeringa starta denne støtteordninga for å passe på at kommunar med vindkraft skal få noko tilbake som kan brukast direkte til å bevare naturen og styrke friluftslivet, seier klima- og miljøminister Andreas Bjelland Eriksen (Ap).

Han seier at målet er å redusere den samla belastninga på natur og friluftsliv i kommunar som er ramma av vindkraftverk.

På Nordvestlandet får Haram pengar til å lage parkeringsplass ved eit turområde. Ålesund får støtte til opprusting av turstiar på Harøy og Finnøya, til parkering og toalett ved friluftsområde på Flemsøy/Skuløy og til inngang og toalettbygg for ungdomslaget Uredd.

Sjå heile lista (ekstern lenke)

Til dømes er det gitt 1,9 millionar kroner til Finnmark fylke til utbetring av ei turløype, slik at ho også kan brukast av personar med nedsett funksjonsevne.

I år er det også gitt pengar til oppføring av sanitæranlegg, gapahukar og etablering av grillplassar på badestrender.

(©NPK)