Årets Lokalmatgründer frå Sogn

(NPK): Lokalmatgründer-prisen går i år til eit tilflytta dansk par i Luster.

For tiande år på rad blir Årets Lokalmatgründer delt ut av Meny og Hanen. Nærare 300 kandidatar har vorte vurderte, og juryen har gitt årets pris til Bøtun gard i Luster i Sogn.

I pressemeldinga står det om Martin og Mathilde Buch Larsen – det danske paret som driv Bøtun gard:

– Bøtun gard viser tydeleg kva ein kan få ut av eit lite småbruk på Vestlandet med litt fantasi, kreativitet og mykje hardt arbeid og pågangsmot. Dei har saman skapt ei berekraftig perle, med marknadshage, kafé og ein brennande lidenskap for å dyrke mat på premissane til naturen. Kundane deira er kjende hotell og matstader i Sogn og turistar frå både Noreg og verda elles. Lokalbefolkninga får også nyte godt av Martin og Mathildes skaparkraft ved å kjøpe ferske grønsaker gjennom eit matkasseabonnement.

Juryleiar Hilde Charlotte Solheim meiner Bøtun gard er ein svært god representant for det å skape eit nytt livsgrunnlag på eit lite småbruk for sauehald utan økonomisk grunnlag i dagens landbruk.

– Bøtun gard viser at det verkeleg er mogleg å omskape eit svært lite småbruk, til ein bokstaveleg blomstrande gard, med økonomi til å bere eit heilt årsverk og endå fleire tilsette i sesongen.

Vinnaren av prisen får 50.000 kroner og eit diplom.

(©NPK)