Økokrim: Finnes-avgjerd «i løpet av hausten»

(NPK-NTB): Økokrim-sjef Pål Lønseth opplyser at dei i haust vil vurdere om det er grunnlag for å opne etterforsking av aksjehandelen til Sindre Finnes.

Det er Bergens Tidende som tysdag har spurt Økokrim om det er teke ut sikting i saka. Dette er dagen då Finnes gjorde sitt siste kjøp av aksjar i Nordic Mining for ti år sidan – og dette er derfor foreldingsfristen.

Foreldingsfristen gjeld ikkje dersom nokon blir sikta.

Lønseth svarer ikkje konkret på spørsmålet om sikting, men skriv dette:

– Økokrim vil i løpet av hausten vurdere om det er grunnlag for å opne etterforsking. Vi vil kunngjere offentlegheita ei avgjerd når ho ligg føre. Vi har ingen ytterlegare kommentarar.

(©NPK)