365 millionar til Salmon Evolution

Omlag 350 millionar kroner i ny eigenkapital var målet, ifølgje meldinga Salmon Evolution sende ut i det handelen stengte på Oslo Børs i går ettermiddag, tysdag 18. juni.

Like før midnatt var kapitalutvidinga i boks. Selskapet fekk inn 365 millionar kroner og kursen var 7,50 kroner aksjen.

Les børsmelding her

Då børsen stengte i går ettermiddag var kursen 7,86 kroner, som er like under det høgaste aksjekursen har vore i år (sjå grafikk under).

Pengane skal vere med og finansiere andre byggesteg av Salmon Evolution sitt landbaserte lakseoppdrettselskap i Indre Harøy på Romsdalskysten.

Med andre byggesteg i full drift vil Salmon Evolution meir enn doble produksjonskapasiteten til anlegget, frå 7.900 til 18.000 tonn hovudkappa og sløyd laks i året.

Går inn med 17 millionar
Salmon Evolution vart etablert av nordvestlendingar og har ei rekkje investorar frå Nordvestlandet på lista over dei største eigarane. Fire av dei sju største eigarane før kapitalutvidinga har adresse på Nordvestlandet.

Halsebakkfamiliens investeringselskap Ronja Capital er største aksjonær i selskapet, med 7,3 prosent av aksjane før kapitalutvidinga. Ronja Capital går inn med 17 millionar kroner i kapitalutvidinga og får tildelt 2.266.666 av dei i alt 48.666.666 nye aksjane selskapet skriv ut. Frå før var eigarskapen Salmon Evolution fordelt på 413.936.640 aksjar.

Grunnlaget for Halsebakkfamilien si formue er medeigarskapen i brønnbåtselskapet Sølvtrans i Ålesund. Odd Einar Sandøy på Harøya og familien eig brønnbåtreiarlaget Rostein gjennom selskapet Rofisk og er også medeigar i Salmon Evolution. Rofisk eig 3,5 prosent av Salmon Evolution før kapitalutvidinga.

Peder Stette og familien er sjuande største eigar før kapitalutvidinga og eig 2,8 prosent i Salmon Evolution før kapitalutvidinga, gjennom selskapet Stette Invest. Stette Invest går inn med fem millionar kroner og får tildelt 666.666 nye aksjar.

Frode Håkon Kjølås eig tre prosent av Salmon Evolution før kapitalutvidinga gjennom selskapet Kjølås Stansekniver.

Betra lønsemd
På slutten av fjoråret kunne Salmon Evolution vise fram tal som første gong nådde «break even» for drifta I Noreg.

Første kvartal i år viste eit overskot på drifta for heile selskapet, etter inntekter på meir enn 100 millionar i perioden, ifølgje kvartalsrapporten.

Resultatet før skatt blei minus 1,2 miillonar kroner i første kvartal og selskapet ventar å omlag doble slaktevolume i andre kvartal samanlikna med første kvartal i år.