37 prosent USA-fall for sjømat

NPK-NTB-Ole Henrik Tveten: Noreg eksporterte sjømat for 14,8 milliardar kroner i januar, ein nedgang på 3 prosent samanlikna med januar i fjor. Eksportverdien til USA fall 37 prosent.

I kroner er nedgangen i januar på 416 millionar kroner, opplyser Noregs sjømatråd i ei pressemelding.

– Lågare laksepris, ein svekt amerikansk dollar, reduserte kvotar for fleire villfiskartar og tøffare konkurranse i viktige marknader gjer at den norske sjømateksporten fall i januar, seier administrerande direktør i Noregs sjømatråd, Christian Chramer i ei pressemelding.

I januar i fjor var USA den største enkeltmarknaden, men på eitt år er eksportverdien redusert med 37 prosent. No er USA passert av Polen, Nederland og Kina på oversikta over Noregs største enkeltmarknader. 

Krevjande marknadssituasjon
– Høge og uføreseielege tollsatsar og ein svakare dollar har skapt stor uvisse og utfordringar i USA, som framleis er vår største filetmarknad for både laks og aure. Den krevjande handelssituasjonen er noko vi ser følgjene av no, seier Chramer.

Når det gjeld Polen og Kina – som er dei to største marknadene i januar målt i verdi – er trenden motsett. Eksportverdien til Polen var på 1,9 milliardar kroner (+55 prosent), medan han i Kina var på 1,2 milliardar (+8 prosent).

– For aller første gong passerte eksportverdien for laks til Kina ein milliard kroner i ein enkeltmånad, så den sterke etterspurnaden dempar nokre av konsekvensane av nedgangen til USA, seier Chramer.

I januar auka den europeiske marknaden sin del av den totale norske sjømateksporten frå 62 prosent til 66 prosent samanlikna med same månad i fjor. 

Verdifall for laks
I januar eksporterte Noreg 112.092 tonn laks til ein verdi av 10,4 milliardar kroner. Samanlikna med januar i fjor har verdien falle med 133 millionar kroner, eller 1 prosent. I volum er det derimot ein vekst på 20 prosent.

For laks var Polen, Kina og Frankrike dei største marknadene i januar. Her hadde Polen størst verdivekst, med ein auke i eksportverdi på 424 millionar kroner, samanlikna med same månad i fjor. Auken er på 42 prosent. 

Ifølgje Noregs sjømatråd har kor viktig USA er som filetmarknad fått konsekvensar for den norske filetindustrien. Etter ein vekst i eksportvolum på 8 prosent for filet av laks og aure i fjor, fall eksporten 9 prosent i januar samanlikna med same månad i fjor.

– Dette gir følgjer for større delar av sjømatnæringa. Uvissa femnar breitt, og den globale sjømathandelen er så tett samanvoven at dette får noko å seie på tvers av fleire artar og marknader, seier Chramer.