Avgiftskutt vedtatt

NPK-NTB: Regjeringa følgjer opp stortingsvedtaket om reduserte avgifter på drivstoff, og frå 1. april vil alle satsane i vegbruksavgifta på drivstoff setjast til null.

Det inneber at avgiftene på bensin blir reduserte med 4,41 kroner per liter, og at avgiftene på diesel blir redusert med 2,85 kroner per liter, begge inkludert meirverdiavgift, skriv regjeringa i ei pressemelding.

– Vi går no ut frå at bensinstasjonane følgjer opp dette ved at dette er avgiftsreduksjonar som faktisk kjem forbrukarane til gode, seier finansminister Jens Stoltenberg måndag morgon.

Også CO2-avgifta på mineralolje til fiske og fangst i fjerne og nære farvatn blir sett til null.

Endringane er mellombelse og gjeld frå 1. april til 1. september.

Overstyrte regjeringa
Drivstoffkutta kjem etter at Senterpartiet, saman med Høgre, Frp og KrF, sikra fleirtal for mellombels lågare bensin- og dieselprisar, og dermed overstyrte Arbeidarpartiet-regjeringa.

Stoltenberg har åtvara mot kutta og peika førre veke på at forslaget ikkje er finansiert i statsbudsjettet og vil auke oljepengebruken.

– Høgres forslag vil koste 3,3 milliardar kroner, og det føreset at avgifta blir igjen auka den 1. september. Varer det ut året, kostar det 8 milliardar kroner, sa Stoltenberg frå talarstolen i Stortinget torsdag.

Fleire kutt kjem
Det vart også vedteke kutt i CO2-avgifta for ei rekke typar drivstoff til næringslivet, men tiltaka kan ikkje setjast i verk før enkelte avklaringar er gjort.

– Det er både reint avgiftsteknisk, men også i forhold til EU-regelverket. Der treng vi meir tid, ganske enkelt for å avklare at vi ikkje gjer dette på ulovlege måtar, seier Stoltenberg.

Kutta i CO2-avgifta gjeld anleggsdiesel, drivstoff til innanriks kvotepliktig sjøfart og innanriks sjøfart.