Avisoppgang på Nordvestlandet

NPK-NTB/NETT NO: Fjordabladet i Stad kommune har relativt største opplagsauke, medan Vestnesavisa hadde den største prosentvise nedgangen i opplaget blant avisen på Nordvestlandet, viser halvårsstatistikken til Mediebedriftenes Landsforening. (sjå tabell under)

Regionavisene aukar med 3 prosent, medan lokalavisene held opplaget stabilt det siste året og dei nasjonale media går noko tilbake, ifølgje ei pressemelding frå Mediebedriftenes Landsforening (MBL).

Kutt på papir – digital vekst
Det digitale opplaget aukar ifølgje MBL med 8,5 prosent og er på 1,7 millionar, medan kategoriane komplett og papir går tilbake med høvesvis 15 og 20 prosent. Det betyr at det heildigitale opplaget no utgjer 67 prosent av totalopplaget, komplett utgjer 30 prosent medan det reine papiropplaget utgjer berre 3,6 prosent.

For Sunnmørsposten, som er den største avisa på Nordvestlandet, utgjorde aviskjøparare som berre har papiravsia under ein prosent av det samla opplaget. Aviskjøparane som berre har den digitale utgåva utgjorde 66 prosent av opplaget.

I fjor fall inntektene til avisene på Nordvestlandet, på grunn av reduserte annonseinntekter.

Papir er på retur og dei siste tre åra har meir enn 60 aviser kutta i talet på utgåver, i første halvår i år endra 25 titlar frekvens.

Meir sal av heildigitale abonnement kompenserer for mykje av bortfallet på papir, ifølgje MBL. Både nisjeavisene og lokalavisene kan vise til ein tosifra digitalvekst, medan riksavisene aukar med 1,5 prosent digitalt.

– Mange mediehus står i krevjande utfordringar, og fleire har det siste året endra frekvens. Tilbakegangen på papir er derfor forventa. Samtidig ser vi at dei digitale tilboda til mediehusa er attraktive for abonnentane, digitalopplaget aukar, og fleire lykkast godt med å få med seg brukarane over på digitale flater, seier administrerande direktør Randi S. Øgrey i MBL.

Stabilt for lokalavisene
Svært stabile opplagstal tyder på at lesarane er glad i lokalavisene sine, meiner Landslaget for lokalaviser (LLA), som også kom med tala sine tysdag. Vinnaren er Hallingdølen, som aukar med 461 til 11.508 abonnentar. Totalopplaget for LLAs aviser i første halvår i år er 388.547.

– Stabile opplagstal vitnar om at lokalavisene står sterkt landet rundt. Vi gler oss over at folk set pris på avisene våre og den redaktørstyrte, truverdige journalistikken. Det inspirerer oss også til å vidareutvikle den nye samarbeidsdesken i Bergen som LLA, NRK og Senter for undersøkjande journalistikk (SUJO) er godt i gang med, seier generalsekretær Tomas Bruvik i LLA i ei pressemelding.

Dag og Tid er den LLA-avisa som går mest fram i talet på eksemplar. Nynorsk-avisa aukar med 702 og til eit totalopplag på 14.752.