Børsdagen: Blåmandag med solgløtt

Hovudindeksen til Oslo Børs er i skrivande stund ned 1,23 prosent, og det har vore ein tung start på veka i dei europeiske aksjemarknadene, med raude tal så langt auget kan sjå.

Ny kontrakt
Hav Group meldte i dag om ei ny kontrakt på design og utstyr, til ein verdi av 200 millionar kroner.

Aksjen enda dagen opp 3,83 prosent frå fredagens sluttkurs, og omsetjast for 10,30 kr.

Lysglimt i mørket
Selskapa frå Nordvest har gjort det betre enn snittet, og dagens soleklare vinnar er Havila Shipping.

Kursen er opp 17,4 prosent i dag, og ein må nett no ut med 13,88 kroner for å bli eigar av ein aksje. Så langt i år er Havila Shipping opp 12,1 prosent.

Nedoverbakke og unnarenn
Arctic Bioscience låg lenge an til å bli dagens store børstapar, og ikkje lenge før handelsslutt låg kursen på 8,88 kroner, ned 14,2 prosent frå forrige sluttkurs.

Med få minutt att av handelen snudde pilene, og det sunnmørske bioteknologiselskapet avslutta handelsdagen med ein nedgong på 8,02 prosent, til ein kurs på 9,52 kroner.

Taparen frå Nordvest enda i staden for opp med å bli Statt Torsk, som er ned 9,49 prosent i dag.