Design og utstyrskontrakt til Hav

Hav Group-selskapet Hav Design har sikra ein avtale til ein verdi av 200 millionar kroner med danske Esvagt.

Det opplyser selskapet i ei børsmelding tidleg måndag.

Leveransen inkluderer skipsdesign og integrert utstyrspakke som inneheld framdriftssystem, motorar, propeller og posisjoneringssystem, heiter det i meldinga.

Hav Group-aksjen steig etter nyheita blei kjent måndag. Ved 10-tida var verdien opp 3,83 prosent til 10.30 kroner.

Hovudindeksen på Oslo børs peika ned med nær ein prosent på det tidspunktet.

Byggjast i Tyrkia
Utstyret skal om bord på eit metanoldreve serviceskip for havvindmarknaden med HAV 833 SOV-design. Det 93 meter lange skipet blir også utstyrt med batteripakke.

Serviceskipet er det 11. i rekka som Hav Group leverer utstyr til og utviklar i samarbeid med Esvagt. Tidlegare har mellom anna det tidlegare Havyard-verftet i Leirvik levert fleire tilsvarande skip.

Denne gongen skal skipet byggjast ved det tyrkiske Cemre-verftet. Hav Design er kontraktsparten til Hav Group.

Flåte med 40 skip i havvind
Serviceskipet skal i hovudsak nyttast til å transportere teknikere og reservedelar til havvindparker.

Når skipet står ferdig, skal det gå inn i Ørsteds «UK East Coast Hub» ved Grimsby - der fleire vindparkar er lokalisert.

Esvagt har ei flåte på meir enn 40 fartøy i havvindmarknaden.