Børsdagen: Havila Kystruten dagens vinnar

2. juni fall aksjekursen i Havila Kystruten til 3,55 kroner.

Så seint som 28. april i år var aksjekursen til selskapet 9,28 kroner, men så starta ein bratt nedtur som ikkje snudde før kursen var nede i 3,55 kroner aksjen.

Kursfallet skjedde i samstundes som selskapet kom med meldingar om at Havila Kystruten var i ferd med å løyse problema med å fri seg frå banda til sin statseigde russiske långivar, GTLK, og dermed kunne kome fri frå konsekvensen av at GTLK var omfatta av sanksjonane mot Russland.

Det var naudsynt for å få refinansiert Havila Kystruten og få sett dei to siste av fire skip i rute mellom Bergen og Kirkenes.

No ser det omsider ut til at aktørane i aksjemarknaden har fått trua på at Havila Kystruten faktisk vil lukkast. Dei juridiske hindra er passert. Det som gjenstår no er å få investorar med på eit obligasjonslån på 4,7 milliardar kroner.

I dag enda Havila Kystruten-kursen på 5,98 kroner, opp 25,58 prosent sidan sluttkurs i går.