Børsdagen: Kurshopp på samarbeidsavtale for Hofseth Biocare

I ei børsmelding fredag skriv Hofseth Biocare i Ålesund at selskapet har inngått eit strategisk samarbeid med Symrise, eit internasjonalt børsnotert selskap som lagar smak- og lukt-ingrediensar.

I 2023 hadde Symrise 4,7 milliardar euro i driftsinntekt.

Avtalen mellom dei to inneber mellom anna at Symrise låner fem millionar euro - omlag 58 millionar kroner - til utvidinga og moderniseringa av Hofseth Biocare sitt produksjonsanlegg i Berkåk i Trøndelag. 

Avtalen gjer óg at Hofseth Biocare-produkt blir distribuert til fire av Symrise sine «globale nøkkelkunder», ifølgje meldinga.

Kurshopp
Børsmeldinga vart sendt ut før børshandelen opna. Då børsen stengte torsdag var kursen til  Hofseth Biocare-aksjen 2,65 kroner. 

Då handelen starta fredag steig kursen til 2,95 kroner, og seinare til 3,08 kroner aksjen. Då børsen stengte i ettermiddag var kursen 3,06 kroner, ein oppgang på 15,47 prosent frå dagen før. 

Hittil i år er kursen opp 80 prosent.

Stor utviding
Hofseth Biocare vidareforedlar avskjer og restråstof frå lakseslakteri, til produkt som blir bruk i helsekost- og kjæledyrfôr. Dei jobbar også med å utvikle produkt som kan bli legemiddel. 

Selskapet er børsnotert, med hovudkontor i Ålesund og produksjonsanlegg i Midsund og på Berkåk.

Planen er å bygge ein ny fabrikk på Berkåk, med 2,5 gangar så stor produksjonskapasitet som selskapet sitt anlegg i Midsund har i dag. 

I desember 2024 sa administrerande direktør Jon Olav Ødegård i Hofseth Biocare at målet er å ha det nye anlegget klart om eitt og eit halvt til to år. Då vil talet på tilsette går frå dagens åtte til omlag 40.

I tillegg til lånet frå Symrise, har Sparebank 1 Nordmøre gitt eit lån på opptil 60 millionar kroner, ifølgje ei pressemelding.

Artikkelen er oppdatert, mellom anna med aksjekursar til børsnoterte selskap på Nordvestlandet, etter at børsen stengde i ettermiddag.