Bank og bustyrar på befaring etter hyttekonkurs

Ni av 15 fritidsbustadar konkursråka Stranda Fjellgrend bygde i eit leilegheitsbygg på Strandafjellet, er overlevert til kjøparane.

Onsdag kjem bustyrar Cathrin Myre Skram i Tinde Advokatfirma på befaring, saman med blant andre ein representant for banken, for å finne ut kva som skal skje med dei seks leilegheitene som står att.

Myre Skram seier det per i dag er registrert krav på 27,9 millionar kroner etter konkursen. Ho reknar med at krava kjem opp i omlag 35 millionar kroner. Verdiane i selskapet er rekna til omlag 27 millionar kroner.

Sparebank 1 SMN långivar
Det er Sparebank 1 SMN som er långivar.

Befaringa onsdag skal vere med på avgjere korleis dei seks uferdige leilegheitene skal handterast.

To av leilegheitene er så godt som ferdige, ifølgje Frode Kjetil Mork. Han var styreleiar i Stranda Fjellgrend og eigde selskapet saman med Jan Arvid Berge, Vidar Mork.

Det er kombinasjonen av forseinkingar, kostnadsauke og renteauke som er årsaka til konkursen, ifølgje Mork.

Stor utbyggar
Stranda Fjellgrend har vore den største utbyggaren av fritidsbustadar på Strandafjellet i fleire år.

Selskapet har bygd ut i alt 120 fritidsbustadar, både hytter og leilegheiter, seier Frode Kjetil Mork til Nett No.

Gjennom eit anna selskap, har eigarane av Stranda Fjellgrend eit regulert område på Fursetsida på Strandafjellet med plass til omlag 30 fritidsbueiningar. Mork vil vente med å kommentere kva som skal skjer med dette, til situasjonen rundt Stranda Fjellgrend er meir avklart.