Blir ny sjef for 160 Kongsberg-tilsette

Jan Terje Aakre er ingeniør og leiar for ettermarknaden i Kongsberg Maritime-divisjonen Propulsion & Handling.

Snart tek han over som sjef for verksemdene som Kongsberg sel til eit Norvestor-fond.

Måndag møter han dei tilsette både i Brattvåg og Ålesund saman med ein representant for Norvestor. Samstundes blir det også halde allmøte i Hagavik.

Det nye selskapet, Neuver Maritime, har vekstplanar. Difor kjem dei til å trenge fleire folk, enn dei 160 som skal vere med over i det nye selskapet om nokre månader.

Lyser ut nye jobbar
– Vi kjem til å lyse ut mange spennande stillingar, seier Aakre.

Han skal ha folk både i leiarjobbar, i produksjonen og i ettermarknaden.

I tillegg til dei tilsette i Noreg, skal det nye selskapet og ha folk i Kina, Sør-Korea, Singapore, USA og Italia. Dei er allereie i ferd med å etablere kontor der.

Har levert til 14.000 skip
Det nye selskapet har 70 års historie bak seg og har leverrt utstyr til 14.000 skip.

Kongsberg Maritime er eitt av dei marknadsleiande på dette feltet, og etableringa av det nye selskapet er ein unik sjanse, med sterke investorar bak seg, ifølgje Aakre.

– Vi har vekstplaner og vi skal ta større marknadsandelar, seier Aakre.