Kongsberg sel styrmaskin- og rorverksemda

80 Kongsberg-tilsette i Brattvåg og 15 tilsette i Ålesund arbeider i styrmaskin.- og rorverksemda som no blir seld til Norvestor-fond.

Verksemda omfattar óg ei avdeling i Hagavik ved Bergen og personar som arbeider med sal og ettermarknaden.

I alt 160 tilsette får ny arbeidsgivar.

– Det er vanleg drift for dei tilsette hos oss dei neste månadene, samtidig blir det ein sokalla «carve-out-process» der vi forebur oss på at nye eigarar kan ta over om nokre månader, opplyser kommunikasjonsdirektør Anette Bonnevie Wollebæk til Nett No.

Skal samarbeide
Ifølgje børsmeldinga skal styrmaskin- og rorverksemda drivast vidare som eit eige selskap.

Samtidig skal dei samarbeide med Kongeberg Maritime «om å levere konkurransedyktige styremaskiner og ror», ifølgje meldinga.

Etter salet, som er venta å vere gjennomført i første kvartal neste år, vil Kongberg Maritime ha 260 tilsette i vinsjmotorproduksjonen i Brattvåg.

Kva Norvestorfondet betalar er ikkje opplyst.

Les børsmelding her (ekstern lenke)

Utgjer kring fire prosent av omsetninga
Verksemda står for kring fire prosent av omsetninga i Kongsberg Maritime, om lag 850 millionar kroner og er del av Propulsion and Handling-organisasjonen.

Salet er i tråd med Kongsberg Maritime sin strategi om å bidra til lågare utslepp frå skipsfarten gjennom integrerte system som har fokus på elektrifisering og digitalisering.

Per Håvard Siljan Hjukse i Kongsberg Maritime uttaler at dei er nøgd med å ha inngått ein avtale med Norvestor, og at dei trur verksemda vil halde fram å utvikle seg godt under nytt eigarskap.

Forvalter meir enn 60 milliardar
Norvestor er eit private equity-fond som jobbar med mellomstore selskaper i Norden.

Investorane har samarbeida sidan starten av 1990-talet og har hovudkontor i Oslo.

Gruppen er rådgivarar for, og forvaltar fond, med en samla verdi på meir enn 60 milliardar kroner.

Alle saker om Kongsberg Maritime

Kring 1200 tilsette
Verksemdene som no blir selt, blei del av Kongsberg-konsernet for kring seks år sidan. Då kjøpte Kongsberg dåverande Rolls-Royce Commercial Marine frå det britiske storkonsernet i London.

Det gjorde Kongsberg Maritime til ein av dei største private arbeidsgivarane i regionen med avdelingar på Longva, i Brattvåg, Ålesund, Hjørungavåg og Ulsteinvik.

Den maritime utstyrsleverandøren har omlag 1200 tilsette på Nordvestlandet, og har fått kring 75 nye tilsette i løpet av det siste året. Før sommaren blei det også kjent at konsernet skal etablere eit nytt sjømilitært kontor i Ålesund med 5 til 15 tilsette.