Bodø-møte kan avgjere splitting av fiskarlag

Nord Fiskarlag - som er eit regionlag i Norges Fiskarlag - skal ha årsmøte i Bodø 16-17 oktober i år. Det er siste sjanse til å gjere vedtak om korleis Nord Fiskarlag stiller seg til vilkåra Fiskebåt har sett for å bli verande i fiskarlaget, før Fiskebåt skal bestemme seg på sitt årsmøte i Oslo i februar neste år.

Norges Fiskarlag er organisert i tre underorganisasjonar, Nord Fiskarlag, Sør-Norges Fiskarlag og Fiskebåt.

Fiskebåt - som organiserer eigarane av den havgåande fiskeflåten - vil at dei tre organisasjonane skal vere likt representert på landsmøte og i landsstyre, og at Fiskarlaget sin politikk skal vere at fordeling av fiskekvotane skal vere stabile.

Dersom omfordeling av kvotane mellom ulike grupper likevel skal diskuterast, må det ha to tredjeparts fleirtal for å takast opp i landsstyret og for å vedtakast av landsmøtet i Norges Fiskarlag.

Blir vilkåra innfridd vil det gi Fiskebåt større makt i Norges Fiskarlag.

Vil ha signal
Styreleiar Christian Strand Halstensen i Fiskebåt seier til Nett No at Fiskebåt treng signal om at dei øvrige medlemane i Norges Fiskarlag vil innfri dei vilkåra Fiskebåt har sett før dei skal gjere sine vedtak.

I første omgang skal regionlaga i Fiskebåt, i regionane Nord, Vest og Sør, ta stilling til ei eventuell utmelding før landsmøtet i Fiskebåt i februar 2025.

Med den tidsplanen plasserer Fiskebåt ballen hos årsmøtet i Nord Fiskarlag. Det er óg hos Nord Fiskarlag motstanden mot å innfri Fiskebåts sine krav er venta å vere størst.

Økonomisk viktig for fiskarlaget
Fiskebåt-medlemane er den største økonomiske bidragsytaren til Norges Fiskarlag.

Fiskebåt vedtok allereie på årsmøtet sitt i februar i 2023 at det skulle vurderast å finne alternativ til medlemskapet i Norges Fiskarlag, dersom det ikkje blei ei lik maktfordeling mellom dei tre underorganisasjonane.

Fiskebåt viste i vedtaket til at det er Fiskebåt sine medlemmar som betalar mest for å finansiere Fiskarlaget:

«Fiskebåts medlemmer står i dag for om lag 75 prosent av medlemsavgiftene til Norges Fiskarlag, men har likevel begrenset innflytelse gjennom kun 4 av 14 landsstyrerepresentanter, og 17 av 69 landsmøtedelegater. Den havgående flåten risikerer derfor å tape i viktige interesseavveininger mellom flåtegruppene i Fiskarlagets styrende organ», heiter det i vedtaket.

Fiskebåt kan bli ståande åleine
Per i dag er tilrådinga frå arbeidet med å vurdere organisasjonstilknytninga, at Fiskebåt i første omgang skal etablere seg som ein sjølvstendig og frittståande organisasjon ved ei eventuell utmelding.

Det sa Christian Strand Halstensen på Fiskebåt Vest sin fiskerikonferanse i Ålesund i førre veke.

Siste utmelding av Norges Fiskarlag var tema - i 2003 - var det medlemskap i NHO Fiskebåt hadde som alternativ.