Brems for Feel Free Production

Serieproduksjon har aldri vore møbel- og innreiingsprodusenten Feel Free Production si greie. Her er det skreddarsaum som gjeld, men no vil selskapet ha eit standardisert produkt som kan produserast i seriar og gi dei eit nytt bein å stå på.

Det dei satsar på er rampar til skateanlegg, som kan monterast og demonterast på få timar. 

Rampen er bygd slik at den ikkje treng skruar til skjelettet og blir produsert for å bli levert flatpakkar frå fabrikken på Holmøyane ved Hornindalsvatnet. 

Målguppa er til dømes festivalarrangørar som vil ein skaterampe til arrangementet sitt, eller skular som vil ha ein skaterampe som kan takast ned og lagrast inne om vinteren.

Omslag i august
Dagleg leiar David Sigurdsson i Feel Free Production seier selskapet merka ei endring i marknaden i august i fjor, etter å ha sett inntektsrekord året før. Det vart mindre å gjere på dei fleste felt, seier han.

Det har gjort at Feel Free Production  har redusert talet på tilsette, frå 10 til åtte - der ein av dei tilsette per i dag er permittert. Etter underskot i fjor (sjå tabell) har aksjonærane gått inn med 400.000 kroner i ny eigenkapital i år. 

Kjøpte konkursbuet
Dei to møbelsnikkarane David Sigurdsson og Jarl Even Eide kjøpte konkursbuet til Holmøy Møbelfabrikk ved Hornindalsvatnet i 2015 og flytta verksemda dei etablerte i Stryn i 2013 inn i dei gamle fabrikklokala. Både Sigurdsson og Eide er medeigare i selskapet.

Trass inntektsnedgangen i fjor er 2024 året med den neste høgaste inntekta selskapet har hatt. 

I åra 2021-2023 gjekk selskapet med små overskot.