Inntektshopp for møbelprodusent

I 2015 kjøpte dei to møbelsnikkarane David Sigurdsson og Jarl Even Eide opp konkursbuet til Holmøy Møbelfabrikk ved Hornindalsvatnet.

I dag sysselset Feel Free Productions ni og eit halvt årsverk på fabrikken i Holmøyane og kontoret i Stryn. I tillegg til Sigurdson og Eide, er prosjektansvarleg Marta Myklebust og styremedlem Sigurdur Jon Thorvaldsson medeigarar i bedrifta.

Inntektshopp i fjor
I fjor auka selskapet driftsinntektene med nesten tre millionar kroner, til 10,3 millionar. Det er rekord for selskapet. Så langt i år er inntektene høgare enn på same tid i fjor.

Selskapet har investert i nye maskiner og utstyr, som medverka til at resultatet før skatt blei redusert og enda med eit lite overskot i fjor, fortel dagleg leiar Wenche Flølo til NETT NO.

Meir kjent
Det er fleire årsaker til inntektsauken i fjor, ifølgje Feel Free Productions-sjefen.

Selskapet har blitt meir kjent, fekk vere med på eit rehabiliteringsoppdrag på Høgskulen i Volda og hadde eit innreiingsoppdrag på ei over 400 kvadratmeter stor hytte på Strandafjellet med plassbygde møblar.

Skreddarsaum
Ideen til Feel Free Production er å levere spesialbygde møblar og innreiingar til kvar kunde.

Så langt har selskapet ikkje merka at rente- og kostnadsauken har vore ein brems i marknaden.

- Vi sel kanskje møblar til ei gruppe som har pengar å bruke uansett, seier Flølo.