Børsdag: Avslutta veka med mest raudt

Fredagen enda med mykje raude tal på Oslo børs – både for selskapa frå Nordvestlandet – og for handelen elles.

Einaste lyspunktet sett frå regionen var Statt Torsk, som fekk ein opptur etter torsdagens botnnotering. Også Arctic Bioscience, Hofseth Biocare og Havila Shipping hamna i pluss.

Elles var det minus på dei 12 andre selskapa frå nordvest. Eqva-aksjen hadde den dårlegaste dagen med eit fall på 9,36 prosent til 3,1 kroner aksjen.

Atlantic Sapphire var torsdag kveld nest sist ute med å gjere offentleg årsrapporten for 2022 av selskapa frå Nordvestlandet. Den viste at det var eit tøft år for selskapet som driv med landbasert oppdrett i Florida, USA.

Investorane sende aksjen ned fredag, etter å ha lest om korleis selskapet fekk uventa tilbakeslag og difor ikkje nådde måla verken økonomisk, eller i produksjonen.

Atlantic Sapphire har mellom anna endra planar for framdrifta, frå å prioritere utbygging av andre byggetrinn i anlegget ved Miami i USA til å få lønsemd i drifta av første byggetrinn.

Hovudindeksen på Oslo børs fredag enda med nedgang fredag på 0,5 prosent til 1.210,24. Det gjorde at også veka totalt enda med nedgang for hovudindeksen.