Børsdagen: Kystruten-emisjon i vasken

Havila Kystruten gjennomfører ikkje ein reparasjonsemisjon der målet var å hente inn opptil 48 millionar kroner. Det opplyser reiarlaget i ei børsmelding fredag.

Styret fekk fullmakt frå ei ekstraordinær generalforsamling i slutten av desember, til å gjere ein reparasjonsemisjon til 12 kroner aksjen.

Det var tidleg klart at tilleggsemisjonen hang i ein tynn tråd ettersom aksjekursen har vore under emisjonskursen.

Kursen fall i kjølvatnet av at selskapet henta inn 300 millionar kroner i ein retta emisjon tidlegare i desember.

«Antall omsatte aksjer tilsier at aksjonærer som har ønsket å redusere utvanningseffekten av den gjennomførte kapitalutvidelsen,har hatt muligheter til det til kurser på nivå med eller under tegningskursen», heiter det i meldinga.

Tidleg fredag ettermiddag er aksjen opp 0,97 prosent til 10,40 kroner.

Saka er oppdatert med børstabell for Nordvestlandet etter at børshandelen stengte for dagen.