Børsdagen: Norva 24 jaktar nye kjøp

Dei tre oppkjøpa etter 1. kvartal i år vil auke inntektene til Norva 24-konsernet med omlag 350 millionar kroner på årsbasis.

Det går fram av ei børsmelding onsdag.

Konsernet spring ut av industrimiljøet i Stryn. Nordfjord-kommunen er også hovudkontoradressa og heimkommunen til fleire større aksjonærar i det børsnoterte selskapet, som har spesialisert seg på vedlikehald og utbetring av infrastruktur under bakken.

Skal vekse meir
Modellen til Norva 24 er å vekse ved å innlemme nye selskap i bransjen i konsernet ved å ta seljarane inn på eigarsida.

Med denne modellen har dei vakse til eit børsnotert internasjonalt konsern, med verksemd i Noreg, Sverige, Danmark og Tyskland.

Planen er å vekse vidare etter same modell, og på nettsida si inviterer Norva 24 nye selskap i bransjen til å bli ein del av konsernet.

Kursfall
I slutten av 2021 vart Norva 24 børsnotert, på Nasdaq-børsen i Stockholm.

Kursen ved børsnotering var over 32 svenske kroner og nådde ein topp på knappe 39 kroner i august 2022.

Deretter fall kursen under 18 kroner i oktober i fjor, før den byrja å stige igjen. Sluttkursen onsdag var 26,75 kroner aksjen.

Artikkelen er oppdatert med aksjekursar til børsnoterte selskap på Nordvestlandet, etter at børsen stengte for dagen.